اسمحي لي اعتذر لك عن خطاك
وافارق دنيتي كاني بحقك خطيت
يا اغلى من هجرني من لي سواك
اطيب لا قبلت واتعب لامنك قفيت
ألا ليتني شمس تضوي في سماك
وليتني قمر ينور لا منك مسيت
عشقت دارٍ سكنته وارض ممشاك
ولا غير حسنك وطبعك تمنيت
قلبي من بين البشر تعنى وشراك
لاجــلك عـفـت غالين وجفيت
من قـديم الوقت سـاكني غـلاك
اخفي محبتك وابدِيها لا بديت
اول البارح طلبت هـلـي يمناك
إحقروني بعيونهم كني طغيت
قالوا ما تبيك ولاهي اللي تمناك
الله معك كـانك للـعـفـه سعيت
انكسر خاطري مدري وش بلاك
اول تموت فيني واليوم صديت
فقدت الامل كني في يوم عزاك
بلا شعور هلت عبرتي وبكيت
شكيت لربٍ بيده نعيم وهلاك
سألت عطفه وبرحمته رجيت
انا لي قلب يموت ولا يعصاك
طايعٍ لأمرك إن مت او حييت
ياعـالم بالجهر والسر ما يخفـاك
جنبني شر النفوس وين حليت
عزمت ارحل عن دروبك وانساك
ولا احسب كم خذيت وعطيت
أبنهي معاناة قلبٍ تعلق في هواك
بيحسبوني حي وبتحسبني توفيت
عزمت الرحيل واستوقفني ضياك
لا تقتل الحب اذكر كم ضحيت
اظـلـموك معي واظـلـموني وياك
ما يبون لحبنا ذكـرٍ ولا صيت
قالوا لا اندق بـابـك تنساني وراك
وإنك ياما و ياما عني تخليت
قالوا الحب نزوه وإني في صباك
كلها سنين وبالعمر قـد عتيت
زادوا فيك القول بمثل هـذا وذاك
إحرموا عيني النوم ولا غفيت
قلت جعلني فـدوة شـوفك ولقيـاك
ياعاذلين انا بمحبوبتي رضيت
مهما جرى مناي راحتك ورضاك
انتي نبض قلبي وإللي هـويت
الله يسعدك في اخـرتـك ودنيـاك
وجعلك النصيب آللي له وفيت