ياللي تطالع وكنك ما تطالعني
نظرتك هذي حبيبي لا تكررها
صحيح شاطر ولكن صعب تخدعني
انا على الطاير افهمها واطيرها
انا مزاجي واطيع اللي يطاوعني
ان كان لي خلق امررها ... امررها
لا ما اتبع النفس لين النفس تتبعني
النفس ما حدٍ قدرها... بس انا اقدرها
اسمع كلامي اذا ودّك تولعني
سعادتي خلها همك ودورها
بنصحك قوم خلى عنادك وطعني
وتعال نطوي الليالي ونتذكرها
وسمّعني اللي كتبته فيك سمعني
والكلمة اللي تشكّل معك غيّرها
بلسانك الشعر لو تكسّر يمتعّني
كسّر يا بخت البيوت اللي تكسّرها
الشاعر خالد المريخي