ودي اسامح وازيل الجرح واسرك.. لكن يدك فتق عظمي بمنشاره

كم صحت لك وتسفلني ورى ظهرك.. تركض ورى ضو شعشع لك بانواره

ترمي علي لسان بالاقذار متحرك.. واسكت ولا كني سمعت الصوت واقذاره

الدم والروح في جسمك ولا حرك.. فيك المروه ولو لك عرتها عاره

مانيب من يضرب اليدين ويفرك.. ولا نيب تابع نفس للاشرار اماره

ان طحت فالاقدار لا بد انها تمرك.. وتدق بابك وتدك لك دارك واسواره

غرك زمانك وهو لو سرك يضرك.. وان طاع لك يومك ترى الاقدار نكاره

لابد يحيى ضمير مات من شرك.. لا بد تاسى على ماضيك واخباره

ترى الزمان يهد حيل الشب ويبرك.. شيخ عزيز هان منطوقه ومقداره

لو جاك ذاك اليوم بعد الوقت ماغرك.. اعتب على نفس تسلابك باشواره

واصبر على من لا يبيع الكل ويبرك.. واكتم جحيم باحت تجاعيدك باسراره

وان زادك الوقت من اشراره ودرك.. اصبر مثل ناس على الامرار صباره