قصيدة السباع

تهيض خاطري عند الغروب
وفي قلبي كما نار الشبوب
بغيت امشي وضيعت الدروب
وقمت ارمي بها في كل جالي



وانا قدام للطـــرقه بصير
واحير كني اعمى يســتدير
كما اللي طايحا في قعر بير
بعد شلّوه في رمث الحـبالي



ولي (ف)الدرب ليه وعتكار
وانا عارف مخاريج الــديار
ولكن الدروب اقفت قــــفار
وعودت الزم الدرب المـــوالي



عسانا نسلم الدرب التعيب
يكون ان الفرج منا قـــريب
ونجم سهيل ماودي يغــيب
ويبدي لي كما مبدى الهلالي



طوال الليل طرفي مـــاينوم
ادرجـــها فرنجــيا وروم
واقل يالله عسى حظي يقوم
يبين مكسبي من راس مالي



وصليت العشا بعد الهجـــود
وانا ساهر وخلق الله رقـــود
وكثرت الحسايف والوجـــود
وانا في ليلة غدرا لحــــالي



عشر ساعات ماذقت المنام
وحالي باح من فوق العظـــام
سواة الذيب في داج الظلام
ليا منّه عوى في فج خــالي



وطال الليل وانا فـــي عذاب
وشابت لحيتي ونا شـــباب
من اهوال النمـــوره والذياب
تجيني من يمين ومن شمالي



سباع الليل ذربات الـــكفوف
مخاليبا تهاوى ما تصـــوف
تحد انيابها حد الســـيوف
لابوطالب علي يوم القتالي



احس انيابها تصرف صــريف
وفيها الي قوي واللي ضعيف
وانا قدامها ساقي خفيــف
تربي في شماريخ الجبــالي



تقاربني وانا عنها بعـــــيد
وقلبي رايح اقسى (م) الحديد
ولكن يفــعل الله مـايريد
عظيم الشان مرتفع الجلالي



وفيها اللي عن الهـــقـوه يزيد
وفيها الي يصيح ولايصــــيد
وفيها اللي كما بسّ العصيد
ويومي للسباع اللي شوالي


وذاك اللي بدى لي مايهوش
ولا هو من صماريخ الوحوش
يبي صُوْرُه من اطراف الكروش
وانا خايف من اللي مابدى لي


بدى قيسى كما زوله وغاب
وانا اعرف جرته وسط الجناب
بغاني له عشا بين الهضاب
وانا شابر يكون انه عشا لي


ولا ياسبع ياللي مــــابديت
تراني محتزي لك مادريت
ولا تحسبك من شري نجيت
ضواك الحال مافيها مهالي


ولو كانت مخالبيك طـــوال
وتحداني على جرف الهيال
بعد عندي بصيره واحــتيال
وبامر الله عليك الحظ عالي


ولايعجبك ليلك ياســـــباع
تحوفيني طوى مادري شباع
تريني مثل حيدا مـــــايزاع
من انسام الصبا والا العوالي


ضريتي بالفرايس كل عــــام
ولا تعرف حلال ولا حرام
وانا صابر على طوال الدوام
على طول الدوام ادري خيالي


وانا لو كنت في الحزم البراح
لحوشك لين اضويك المراح
وزيداسقيك ( م) السم الذحاح
ولاخرِجْ من قلوبك مامضى لي


مضى لي من مخالبيك جروح
ومن يمهل بدينه مـــايروح
وانا مادري متى سهمي يلوح
وهذا الليل ساعاته طوالي


بغيت ابدي واشوفك راس ريع
واشب النار واحتاشك جميع
ونندر (ف) الجناب الي وسيع
وفي ساعه طريحك مايشالي


ولكن اعجبك حيدا عســــير
عسير ولا معي فيه المسير
ولا ياجابر العظم الكســـير
دعيتك يالذي تدري بحاللي


تراني ما معي غيرك عوين
وتهديني على دنيا ودين
وبصبر يامعين الصــابرين
في الدنيا على مرا وحالي


واذا جاالبعث (ف) اليوم الطويل
يصفاّ الحب والكايل يكيل
ويرمي بالمعاقب والقصــيل
ولايوزن خفاف الا ثقالي


ولايالله في حســــن الختام
واحج البيت حجا كل عام
وسيّر بين زمزم والمــــقام
ونور البيت قدامي يلالي


وصلوا ( ع) النبي ياحــاضرين
صلاة اهل التقى واهل اليقين
ختام الانبيا والمرســــلين
ابو قبه على قبره ظلاليِ