فتحت صـدر الغـلا للطـرق والونـه
وغنيت للشـوق والطـاري مواويلـه
وعنيت لك يا موالـف غيبتـي عنـه
خلت ضمير الوله ياقـف علـى حيلـه
مازلت اداري غـلاك العـذب واحنـه
واشفق على اسمك اذا شفته واغني له
طاريك بن الضلوع العـوج لـه حنـه
فرعة صباحه تحشـم لخاطـرك ليلـه
ياويل حالي عليك من الشقى كنـه !!!
كنه ؟؟؟ لا والله .. لغزٍ صعب تاويله !!
مشاعـري منـك ملهوبـه ومنجنـه
ما غير اردد كفى .. يـا قلـة الحيلـه
فنجال حبك صفـق هيلـه علـى بنـه
لا والله الا صفـق بنـه علـى هيلـه
علمني غيابـك اشكـر هيبتـه لانـه
ازرع توجـاد وحروفـي محاصيـلـه
شف عاد وش صار منك وقول لي عنه
واحكم لكن طالبك ترغب عـن الميلـه
واللي يحسب الجفاء لاهل الغلا جنه ؟؟
في ذمتي ما لمح لاهـل الغـلا زيلـه