ليه الغرام يعـذب النفـس تعذيـب
ياكثر من يشكـي عـذاب المحبـه
قالو جريح الحـب ماظنـه يطيـب
وقالو سقيـم البيّـن معـدوم طبـه
يعني الهوى لوعات نار ولواهيـب
أجل بلاش أغلـي حبيبـي وأحبـه
ماهوصحيح..للحب شرع ومطاليـب
من لا عرفها طـاح طيحـة مغبّـه
الحب له قانون وشـروط ترغيـب
ولايجي حب ً علـى غيـر رغبـه
والحب فن طرق تعامـل واساليـب
ولفت انتباه الشخص يمـك وجذبـه
وشعور ذاتـك يـم ذاتـه مكاتيـب
مسجات ترسل بيـن قلبـك وقلبـه
والشوق ماهو لازم ان خلك يغيـب
بعض البشر تشتاق له وأنت جنبـه
وبعض المحبه فرض عين ومواجيب
وبعـض المحبـه سنـة ٍ مستحبـه
نعم غرام الحـب نـار ولواهيـب
لاصرت تجهل غايـة الـي تحبـه
لاتدفن أحساسـك بدوامـة الغيـب
حاول تبيـن شـوق بعـده بقربـه
ترى كلام الـود والحـب والطيـب
يصحّـي الغافـل سـوات المنبـه
كم شخص عايش في هموم وعواقيب
يمثـل أدواره بعشـره وصحـبـه
وبعض الهوى مكروه لاصار أكاذيب
كلمة أحبك من ورى القلب صعبـه
الحب جنّـه فـي حلاهـا تعاجيـب
فردوس بالدنيـا وريضـان رحبـه
والحب فطره لا محـرم ولا عيـب
لاصار مـن يملكـه بكتـاب ربـه
شعر ابراهيم بن محمد ناشب
لية الغرام.
العرض العادي
