شاب فقير خطب بنت عمه المليونير
وزود عمه طلباته عليه فقال قصيدة
سـبـحـان من يرزق بتوع الملاييـن
الـرازق اللي مـا يخيب الرجـا بـه
ــــــــــــــــــــ
لي عـم عـنده معـرضٍ للصواليـن
أمـوت واعـرف بس من وين جابـه
ــــــــــــــــــــ
وإذا سـألته قـال بعـت الدكاكيـن
مـا يـدري إني ما هضمت الإجابـه
ــــــــــــــــــــــ
الشـاهد إني رحت له قبـل يوميـن
في قـصره الـعامـر ودقيـت بابـه
ــــــــــــــــــ
قـال ارحب ارحب عدّ ورد البساتين
يـا مرحبا باللـي لفـا يـا هلابـه
ـــــــــــــــــــــ
قلت البقا عـدّ النفـل والرياحيـن
يـا شيخ شمل اهل الكرم والذرابـه
ـــــــــــــــــــــ
قـال اسـلم الله يحفظك لي من العين
وآمـر أوامر حـضرتـك مستجابـه
ــــــــــــــــــــ
قلت الـصراحة طالبٍ قرب غاليـن
ودي تـزوجنـي كريمتـك يـابـه
ـــــــــــــــــــ
ثـنّى وقال اهليـن والله وسهليـن
والـكون ترخص لجل عينك رقابـه
ـــــــــــــــــــــ
لـكن ترا عندي شـروط وقوانيـن
قلت اشرط اشرط يا حبيب الغلابـه
ــــــــــــــــــــ
قـال أولاً مـهر العروسـة ثمانيـن
غـير الـرسوم وغير حق العصابـه
ــــــــــــــــــــــ
والثانية عـمك يبي منـك سبعيـن
رسم الأبـوّة والنسـب والقرابـه
ـــــــــــــــــــ
وام العروسة حقها منـك ستيـن
عـشانها ست الحـسـن والمهابـه
ــــــــــــــــــ
واخوانها كلن يبي منـك خمسيـن
عداً ونقـداً تنـدرج فـي حسابـه
ــــــــــــــــــ
وخواتها الخمس اعطهن من ثلاثين
عشان تتوثـق عـروق النسابـه
ـــــــــــــــــــ
وتجيب طقم عيار واحد وعشريـن
وخاتم من الماس المصفى ترابـه
ــــــــــــــــــ
واكياس متروسة كعوب وفساتيـن
ألوانهـا واشكالهـا مـا تشابـه
ــــــــــــــــــ
وموتر بسواقـه وفيـلا بدوريـن
أثاثهـا مـن بطرتـه ينحكـابـه
ــــــــــــــــــ
واحجز لنا قاعة بقصر السلاطيـن
واحجز بهـا رقاصتيـن وربابـه
ــــــــــــــــــ
وامنع دخول اهل اللحى والبزارين
واعزم أميـر المنطقـة بالنيابـه
ــــــــــــــــــ
هذي الشروط اللي على بالي الحين
وذكرني اللي ما حسبنـا حسابـه
ــــــــــــــــــ
قلت اذكر الله يا عـدو المساكيـن
واستغفـره لا يبتلـيـك بعـذابـه
ـــــــــــــــــــ
الظاهر إنك منت عارف أنا ميـن
أنا لو ارقا فـوق متـن السحابـه
ـــــــــــــــــــ
ما جبت حتى نص درزن مواعيـن
واضحك بكيفك واعتبرهـا دعابـه
ـــــــــــــــــــ
شروطكم هذي شـروط المجانيـن
شروطكم شغـل ابتـزاز ونهابـه
ـــــــــــــــــ
شروطكم تقصم ظهـور البعاريـن
شروطكـم همّـن وغـم وكآبـه
ــــــــــــــــــــ
شروطكم والله سيوف وسكاكيـن
تذبح بنات المجتمع مـع شبابـه
ـــــــــــــــــ
وين الرضا والعطف واليسر واللين
اللي ذكرهـا الله بمحكـم كتابـه
ــــــــــــــــــ
وين الصفات اللي أمرنا بها الديـن
وين اختفى نهج النبي والصحابـه
ــــــــــــــــــ
يا عم جعل اللي خلقنا من الطيـن
يرد عقلك مـن خطـاه لصوابـه
ـــــــــــــــــــ
ويجعل نصيبي عند غيرك قل آمين
ويحسن عزا الصابر ويجزل ثوابه
ــــــــــــــــــ
قال انت لو فكرت تفكير صاحيـن
ما شفت في مجمل شروطي غرابه
ــــــــــــــــ
حنا بعصـر العولمـة والمزاييـن
ماهوب عصر الفلسفة والخطابـه
ـــــــــــــــــ
الناس تسعى للرتـب والنياشيـن
وانت اهتمامك بالشعـر والكتابـه
ـــــــــــــــــــ
والشعر ما ينفعك لو هو دواويـن
ما دام جيبك مثـل بيـت الخرابـه
ـــــــــــــــــ
يا بوك لا تسمع كلام المصاخيـن
واسأل مجرب عاش في وسط غابه
ـــــــــــــــــ
قلت الله اكبر يا محـرر فلسطيـن
من يسمعك يحسبك ذيـب الذيابـه
ـــــــــــــــــ
تراك شايب راس مالـك رياليـن
والبنت ما تسوى جنـاح الذبابـه
ـــــــــــــــــ
قال انقلع مالت على وجهك الشين
لا عاد اشوفـك عندنـا يالزلابـه
ـــــــــــــــــ
قلت ابشر ابشر لكن الباب من وين
واقفيت من عنده على صوت بابـه
شاب فقير خطب بنت عمه المليونير
العرض العادي
