بسم الله الرحمن الرحيم
اليوم راح أسولف عليكم سالفة عيال الجنية من البداية وحتى النهاية
هذا سلمكم الله كان فيه بدوي يرعى بالحلال ويحمل برنو على ظهرة وصار له شهرين وهو بالخلاء مرة هنا ومرة اهناك وهذة نعجة والدة وهذا خروفً مكسور وهو على ذا الحال ومتونس وما حولة الوالي . المهم مالكم بالطويلة ويوم أمسى الليل وهو يشب نارة يبي يسوي له قهوة وكاسة شاي على رمث .. المهم وهو يسمع صوت بنت تصيح 
وهو يقوم ويفز ويشيل سلاحة البرنوا ومرةً يروح للعلو هذااااك ومرةً ينهج غاااد 
وكل شوي يسمع صوت البنية وهو يتدلقس من فوق الطعس ويطيح على فرتة والمهم هو يجلس ويركد شوي إلين شاف الذيب يطارح البنية وهو يجية فازن يمة .. ويوم قرب للذيب ويصوب سلاحة البرنوا وهوو يطخة على ضوء عيونة يوم فقش راس الذيب ..!!
والمسكينة البنية الدم معبي وجهها وهو يأخذها عندة ويعالجها 20 يوم .. إلين بدت معالم البنية توضح وما شاء الله عليها جميلة بالحيل ... والمهم يجلس يعالج البنت حوالي ثلاثة شهور إلين طابت وتعافت وهو حتى الساعة هذة ما سئلها من أي العربان هي ...!!
المهم مالكم بالطويلة يوم شاف جمال البنت بدأ يسئل البنت ويحاول إنه يبي يعرف هل هي متزوجة أو لا .. ومن أي العربان هي ..!!
وبعد فترة وهو يسئلها وهي تجاوبة وقالت له إنها ماهي متزوجة
وهو يفرح أخونا ويروح يتدلقس غاد ومبسووط
وقالت له : يا إبن الأجواد انا مو من العربان اللي إنت تعرف ...!!
قال : هاااة
قالت : أنا جنية
قال : أهم شيء إنك تكونين لية
قالت : خلاص بس بشرط إننا نروح يم أهلي وتطلبني من أبوي .
قال : بس هذا طلبك أبشري من الحين نروح وننهج لهم ...!!
وهو يركب الجنية على ظهر الحمار ( أكرمكم الله ) ويشد الرحال إلى أهل الجنية , وبعد خمسة أيام وهم يوصلون للغار عند وقت المغرب ويوم وصلو للغار , قالت الجنية . هنا نسكن .
قال لها البدوي : توكلت على الله ودخلنا الغار
قالت : دخلنا
المهم وهم يدخلون في الغار وينزلون تحت وكل شوي ينزلون تحت إلين وصلوا في بطن الأرض , ولقوهم يصلون المغرب . ويوم سلم الأمام وأخذ يستغفر ( طبعاً الجني ) , جلس خوينا البدوي بجنبة وسلم علية ورد علية السلام ,
وقال البدوي : يا شيخ أنا جاي أطلب يد بنت فلانه .
قال الجني : هاااة وش عرفك بإسمها .
قال البدوي : وذكر السالفة لبوها .
وقال الجني : خلني أخذ رأي البنت إن كانت موافقة أو لا
المهم وهو يسئل بنتة : وهي توافق
قال الجني الشيخ : البنت موافقة بس عندنا شرطين
قال البدوي : وش هي شروطكم
قال الجني : الشرط الأول إنك ما تزعلها , والشرط الثاني إنك تنحنح كل ما تبي تدخل عليها . وإذا أخللت بهذان الشرطان تعتبر بنتي طالق
قال البدوي : موافق
----------
المهم وهو يزف البدوي عروستة الجنية ويأخذها معة
ومن يوم تزوجها البدوي وهذة حالتة كل يوم يتنحنح قبل ما يدخل عليها , وما شاء الله على الجنية عليها جمال جخة ..!!
وبعد مضي خمس سنوات من الزواج وكان الجو شديد الحرارة , جاء البدوي في وقت الظهيرة عطشان وضميان وهو يطلب من زوجتة الجنية كوب ماء , وتجي الجنية تحط له الكوب بجنب الجسفتسير وهو يروح يغسل ويوم جاء يبي يشرب الماء وهي تجي الجنية بسرعة وتكب الماء , وهو يزعل البدوي ويتظايق ولكن تذكر كلام ابوها إنه ما يزعلها وإذا أزعلها تعتبر طالق ...!! وهو يهون وما أزعل الجنية , لأن البدوي يحبها حب عمى .
وتمضي الأيام والشهور وإذا أتاة خبر بأن أخوة في القرية الفلانية مات
وقال البدوي للجنية : يا بنت قومي جهزي حالك نبي نروح نعزي أهل أخوي .. يقصد زوجت أخوة وعيالة .
المهم وهم يروحون وتجلس الجنية مع الحريم وجميع الحريم يبكن ويصيحن إلا حرمت البدوي ذبحها الضحك , ويوم جاء البدوي يبي يضرب الجنية .. تذكر كلام ابوها والشرط اللي اتفقوا علية . وهو يهون البدوي
المهم مالكم بالطويلة
وهو يرجع هو حرمتة لبيتة وبعد مضي سنة وهي تحمل الجنية وما شاء الله جابت له ولد مزيون , وهو يأخذ ولدة وفرحانً به وتجي الجنية تأخذ السيف وتضرب الولد بالسيف
وهو يزعل البدوي ويقوم يصفقها كف إلين خلها تدلقس غااااد عند الكرفاجة وهو يشيل المقشة ويهبدها على غاربها وهي تزعل الجنية .
ويمرحون ذيك الليلة ,, ويوم أصبح ما لقى حرمتة في البيت ,, وهو ينتظر يوم يومين لعلها تجي ولكن ما جت ...!!
المهم ويأخذ الفرس وينهج يم الغار ويوم وصل للغار وهو يدخل وينزل تحت في جوف الأرض ,, ولقها جالسة عند ابوها وتوها واصلة تبكي .
ويجي البدوي يم ابوها الشيخ الجني .
وقال لها يا شيخ إسمع مني وابيك إنت تحكم وتصير القاضي
قال الشيخ الجني :: ترضين يا بنتي إني أحكم بينكم بالعدل
قالت الجنية : ايوة موافقة ...!!
قال الشيخ الجني : ترضي إنت إني أحكم بينكم بالعدل
قال البدوي : إيوة موافق ..!!
قال الشيخ الجني : إذا إسمعوا إذا تكلمت إنت هي تسكت وإذا تكلمت هي إنت تسكت ..!!
موافقين
قالوا : موافقين
قال الشيخ الجني : طيب سولف
قال البدوي : يا شيخ , مرة جيت عطشان وطلبت كوب موية ورحت أغسل ويوم رجعت جيت ابي أشرب الماء جت بسرعة وكبت الماء على الأرض . وما قلت لها شيء ..!!
والثانية : جاني خبر إن أخوي توفى وقلت لها مشينا نروح نعزي وهي جالسة بين الحريم تضحك ..!!
والثالثة يا شيخ : جاني ولد مزيون ويوم أخذتة وفرحان به .. جت ضربتة بالسيف .. وهذا اللي زعلني يا شيخ ومابعد الضنى شيء وقمت وضربتها .. وغير هالكلام ما عندي شيء وأبيك تحكم يا شيخ .
قال الشيخ الجني :
وش تقولين يا بنتي
قالت البنت الجنية : يوم طلب الماء وجبتة له نزلتة على الأرض وراح يغسل وجت حية ونفثت السم بالكوب ويوم جاء يشرب الماء جيت بسرعة وكبيتة قبل ما يشرب
والثانية : يوم يقول إن اخوة توفى وأنا اضحك . أنا ما اضحك على موتة أخوة . نا جالسة اضحك على زوجة أخوة وتقول في نفسها من أخذ من الرجال بعدة ... وهذا اللي ذبحن من الضحك ...!!
والثالثة : يوم جاة ولد .. صحيح كان يلاعبة وجيت أنا بالسيف وضربتة لأنهم كانوا توئم وهذولا عيالة الأثنين شفهم معي ...
وهو ينهبل البدوي من رد زوجتة الجنية وبلش بعمرة
وهو يحكم الشيخ الجني بالطلاق
وقال البدوي : طيب وعيالي
قال الشيخ : عيالك لك إذا قدرت تطلعهم من الغار ولكن إنتبة ترى بيجونك الجن ويحاولون يأخذون عيالك بس تجود بهم زين واللي نأخذة يكون لنا واللي يطلع معاك فوق لك بس إسمع تراهم بيجونك على شكل اعصار وعجاج ومواج بس إنتبة لا تخاف وتجود بعيالك زين .
قال البدوي : زين .. وهو يأخذ عيالة ويطلع فيهم فووووق .. ويجونة الجن يحفونة حوف إلين طاح واحد من عياله 
وهو يمسك الثاني ويحطة على صدرة ويتجود فيه زين إلين طلع فوق سطح الأرض وهو يسلم على واحد من عيالة .
وهذة سالفة عيال الجنية كما سمعتها من الأجداد ورويتها لكم وبقلمي شخصياً عشق وجنون
ولله تعبت وأنا أكتب وجميع الحقوق محفوظة وفي حال النقل يرجى ذكر المصدر ..!!
مراقب المنتديات الخاصة بقبيلة ال حبة والعوامر
منتدى الصوتيات والمرئيات الإسلامية
العرض العادي
