الحق يعمي عيونه لا بدا نوره

سعيد بين اقشر الماضي وحلو اليوم ..
نضحك من الواقع ونبكي على الصورة ..

دورات الايام منها نستفيد علوم ..
والكل ماضي على نهجه ودستوره ..

تستحدث سلوم(ن) ويخفي الزمان سلوم ..
وراعي الشور تنقض فعلته شوره ..

لا عجب لا جاك من صلب الرجال رخوم ..
للعرق دور ولتطبيع الفتى دوره ..

ما نامن الحر لا خاوى فروخ البوم ..
الصحبه السيئة ما تستر العورة ..

والسلعه الفاسده ما تستحق السوم
اللاش مخبور وبضاعته مخبورة ..

من عاش في ظلمة الباطل حياته دوم
الحق يعمي عيونه لا بدا نوره ..

صحيح ما ينبغي جعل الخطاب عموم
لكن حالاته ايضا غير محصورة ..

ما يقطع البحر غير اللي يجيد العوم
ناسن تزله وناس تظل مغموره ..

اصاغر القوم تفرق عن كبار القوم
مثل العبارات منصوبه ومجرورة ..

للمجد قمة تطول وللرجال عزوم
كلن يحدد ثراه ويبني قصوره ..