قم ياخويي وشب نار كبيره
واصرم عليها من الحطب لين تعتز
نار لها مع طلعة الشمس نيره
ليشافها العمسان عقب العمس فز
وهات الدلال وحطهن بالحظيره
واجذب لها جمر الغضا واترك القز
حتى الى جونا الوجيه السفيره
على تنابيل يكزونها كز
يلقون فنجال شرابه بريره
يطرب لها العمسان ليمزها مز
ومن عقبها كبش اشحومه كثيره
الى جت مواجيبه يقلط على رز
في روضة عقب المطر مستديره
من سيلها تلقا بجيلانها حز
ليهب ذعذاع النسيم بغديره
تلقا بها الغرنوق والبط والوز
وش خانة الدنيا الختول الغريره
ليما ادرك الرجال باطرافها عز
نفرح بها نبي الشرف والستيره
وعن حاجة تحوج لمن لا يميز
تمسي بها وامن وتصبح مغيره
ولابد من صدفاتها لو تحرز
خاب وخسر من حطها له ذخيره
والموت راياته على الناس تهتز
لبد من قبر هيام حفيره
فوقه طويلات النصايب تركز
الرد
يالله يـاعـالـم خـفايا السـريـره
تعين فى قافن صعيبن ومعجز
هاكم معاني من ضميري مثيره
وين أنت ياللي للمعاني تـجـهـز
لا شفت بالمعنى سلك الحريره
السـلـك منـتوجه ترا دودة الـقـز
قلبي رقيق(ن) والمشاعر اسيره
يثـيـرني المعـنى لا خـزني خز
هزة فؤادي بالهمـوم و تـديـره
هزة هبايب لأخضر الغصن لاهز
موجه تلاطم بالبحور الغزيره
هذا نصـيبي بالعـنا لـزنـي لـز
ظلمة بحـور وكلـبوهـا خـطـيـره
لا شك أيماني وسط قلبي مركز
ولعت شـمعه فى ظـلامـي تـنـيره
شمعة أمل فى ظلمة الليل تغرز
وجيت أتعـكـز والمشاعر كسـيره
كسـيـر روح والأمـل دزنـي دز
ولابد من يوم(ن) عـلـيـنا مـسـيره
حـكـم الـقدر ما رد عنه التحـرز
وكل(ن) على ما قيل واجه مصيره
وش خـانـة الدنـيا تجـمع وتكـنز
يالله عسى ماصار خير(ن) وخيره
تم الجواب وزبدة الهرج موجز
قم ياخويي وشب نار كبيره
المنتدى العام
منتديات ال حبه العلمية والتقنية
العرض العادي
