الإهداءات


العودة   منتديات آل حبه > منتــــديات آل حبه المنوعــــة > منتدى الأخبار المتفرقة

منتدى الأخبار المتفرقة يحوي أخبار متفرقة من مواقع إخبارية وصحفية

إضافة رد
 
أدوات الموضوع انواع عرض الموضوع
قديم 16-09-2018, 12:30 AM   #1
 
تاريخ التسجيل: Jan 2009
المشاركات: 316,510
معدل تقييم المستوى: 3183
alhebah.com is a jewel in the roughalhebah.com is a jewel in the roughalhebah.com is a jewel in the rough
افتراضي بعت أول خدمة في 10 أيام فقط، إزااااي ؟!

السلام عليكم, حبيت احكي تجربتي عل وعسى حد يستفيد منها

أنا ليا تجربتين فـ موقع خمسات، الأولى فشلت والتانية نجحت.
هحاول أبسّط الدنيا وأشرح ليه فشلت وليه نجحت.

زيي زي أي حد سمع عن الموقع ودخل عرض خدماته ومفيش ولا خدمة اتباعت، زهقت وسبت الموقع لمدة سنة كاملة لحد ما بعتولي رسالة إن الحساب وقف قولت جت من عندهم.
من 10 أيام فاتوا بس رجعت تاني للموقع، انهارده بعت أول خدمة !
طب إيه الفرق والتغيير اللي حصل ؟!

الفرق يتلخص في 3 كلمات ملهمش رابع:

⬅التخطيط
⬅الاستمرارية
⬅الخبرة

دي بإختصار تجربتي، كل اللي جاي هو شرح للنقاط دي

✅ التخطيط:

بمعنى تاني انت داخل الموقع حاطط لنفسك تارجت توصله ولا لأ ؟!
فـ تجربتي الأولى، كنت داخل بدون أي تخطيط او تارجت، داخل أجرب حظي وخلاص عشان كدا فشلت.

في تجربتي التانية، كنت داخل وأنا عارف أنا عايز أوصل لإيه، كان التارجت بتاعي إني أبيع أول خدمة على خمسات ولما يتحقق اتنقل لتارجت أعلى، والنتيجة إني الحمد لله حققته ودلوقتي بفكر في تارجت غيره.

✅ الاستمرارية:

عايز تنجح فـ أي مجال فـ حياتك مهما كان نوعه، استمر.
استمر حتى لو النتائج طلعت سلبية فـ البداية.
استمر حتى لو شايف إنك بتبذل جهد ووقت بدون مقابل.
من الآخر "اتقل تاخد حاجة نضيفة"

في تجربتي الأولى، عرضت خدماتي واتفاعلت مع طلبات الخدمات غير الموجودة بس لحد إمتى ؟
أسبوعين تلاتة اللي هما وقت الحماس (اللي انت هتحس بيهم وانت بتقرأ الكلام دا)بس زهقت ملّيت، مبقتش بدخل ع الموقع ولا بتفاعل، عشان كدا فشلت.

فـ تجربتي التانية، اتفاعلت بشكل مستمر وبمعنى أصح عملت ضجّة وانتشرت فـ كل مكان فـ الموقع، دا بيخليك مألوف للأعضاء وخلاص حفظوا شكلك.

⭕ الاستمرارية مهمة جدا لما تكون بالكيف وليس بالكم، يعني مش معنى كلامي إنك تقعد الـ 24 ساعة ع موقع خمسات، لأ خليك ذكي خصص ولو ساعة واحدة فـ اليوم تدخل فيهم ع الموقع، أهم حاجة جمب خانة آخر تواجد يكون مكتوب (اليوم أو البارحة)..

✅ الخبرة:

ولو إنها نقطة مش محورية أوي وممكن نتغاضى عنها، أغلب اللي موجودين ع الموقع معندهمش خبرة كبيرة يعني، وأنا منهم.

فـ تجربتي الأولى، من ضمن الخدمات اللي قدمتها كانت ترجمة من عربي لإنجلش، وأنا أصلا مليش فـ الترجمة ومش مجالي، أنا اختارتها عشان لقيت عليها طلب كبير فـ الموقع.
ودي كانت أكبر غلطة عملتها عشان كدا فشلت.

🚫 غلطة تانية عملتها، كنت مقّدم خدمة كتابة مقالات بس مكنش عندي نماذج سابقة.
مكنتش لسه فهمت أصلا يعني إيه سيو ومقال حصري والكلام دا، كان كل فكرتي عن كتابة المقالات إنها زي موضوع التعبير بالظبط.

فـ تجربتي التانية، عايز أقولكم أنا مقّدم خدمة واحدة فقط وهي كتابة المقالات، الحاجة اللي بفهم فيها وبس.
المرادي كنت مقّدم الخدمة وأنا فاهم أبعادها كويس وعرفت يعني إيه سيو ولو بشكل سطحي، عملت نماذج وكتبت مقالات خاصة بيا بحيث لو العميل طلب نماذج سابقة أكون جاهز.

--------

↩ طيب دا كلام جميل أوي وزي الفل بس أنا للأسف مبياكلش معايا الكلام اللي عامل زي التنمية البشرية دا، اللي ياكل معايا هو إنك تكتبلي خطوات ملموسة أنفذها.

خد الخطوات أهي بدون أي مقدمات، بس مع ملاحظة إن أنا بشرح تجربتي والخطوات اللي أنا عملتها خلتني أبيع أول خدمة، يعني دي مش استراتيجية ولا خطة عشان الكلام يبقى واضح.

🔺 لما جيت أقدم الخدمة قعدت حوالي ساعة بختار العنوان كويس والوصف بتاع الخدمة، حطيت نفسي مكان العميل اللي داخل يقرأ الوصف، عكس تجربتي الأولى كنت كاتب سطرين فقط أي كلام وخلاص.

🔺 ركن طلبات الخدمات غير الموجودة، كنز لو عرفت تستغله صح.
أول ما تصحى من النوم وتفتح الموقع، لازم تدخل ع الركن دا.

🔺 لما تعمل تعليق ابعد عن الاسطمبة الثابتة، انك تجهز تعليق معين بتعرض فيه خدمتك وتاخده كوبي بيست، العميل تلقائيا هيشيلك من حساباته ويبص ع تعليقات غيرك.

🔺 خليك صريح مع نفسك، انت لسه جديد وسط شوية وحوش واكلين الشغل كله، يعني لما تعرض خدمتك ادخل بالتقيل وخش بقلب جامد.
مثلا لقيت عميل طالب عدد المقالات اللي هتقدمهاله مقابل 5 دولار، شوف التعليقات وبص ع أفضل عرض وقدم عرض أفضل منه.

🔹مثال:
لقيت كومنت بيقول أنه هيكتب 5 مقالات بـ 5$ ومدة التسليم 4 أيام.
ادخل ع طول بكومنت إنك هتكتب 15 مقالة بـ 5$ ومدة التسليم 2 يوم.
طبّق الجملة العظيمة اللي كلنا عارفينها "سأقدم له عرضا لن يستطيع رفضه"

هتقولي بس كدا كتير أوي عليا والمقابل مش مجزي، هقولك ارجع للتارجت اللي انت حاطه، انك عايز تبيع أول خدمة بأي شكل حتى لو هتبيعها ببلاش.

الصعوبة كلها فـ الموقع إنك تبيع أول خدمة، كل اللي بعد كدا مقدور عليه، يبقى دا شيء يستاهل إنك تتعب له، وارجع اقرأ نقطة "الاستمرارية" اللي اتكلمنا عنها.

🔺 ركن نماذج أعمال قمت بتنفيذها، الناس كلها بتركز ع ركن طلبات الخدمة الغير موجودة وتنسى الركن الجميل دا، ودي غلطة كبيرة.
خليك متفاعل ع الركن دا كويس ونزل النماذج بتاعتك واطلب رأي الناس، والعكس اكتب رأيك فـ نماذج الناس حتى لو انت مشفتهاش أصلا، اكتبله تعليق لطيف كدا..وووو... متنساش ،، استمرررر

🔺 خليك ذكي وحاول تعمل لنفسك شخصية فـ الموقع، يعني إيه ؟

هقولك ع حاجة أنا عملتها، لما دخلت الموقع وشفت ركن الخدمات غير الموجودة لقيت الركن مش منظم وحاجة كدا لخبطة، جاتلي فكرة اقتراح كويس أوي قمت كتبته بشكل شيك كدا ونزلته في مجتمع خمسات،
الناس اتفاعلت مع الاقتراح وعجبهم جدا لدرجة إن شخص من الإدراة كتبلي كومنت وقالي جاري النظر فيه.

دا فايدته إيه ؟..فايدته كبيرة طبعا، الناس بتاخد عنك انطباع مبدئي إنك حد بروفيشنال ودماغك شغالة برغم إنك لسه بائع جديد،

لإنهم بيبقوا شايفين إن البائع الجديد دا حد مبتديء وتقليدي جدا ومش فاهم حاجة.
حاجة مهمة جدا لأي عميل إنه يشوف مستوى تفكيرك عامل إزاي، فبالنسباله انت الرجل المناسب.

↩ دي كانت كل الخطوات اللي مشيت عليها خلال الـ 10 أيام اللي فاتوا وبعدها جاتلي رسالة من عميل إنه عايز يشتري خدمتي، والحمد لله انتهيت من الخدمة ودي أكبر عقبة هتقابلك في الموقع، إنك تبيع اول خدمة
لو تغلبت عليها فاحب أقولك الموقع دا إن شاء الله هيبقى مصدر رزق ثابت ليك.

أتمنى الكلام دا يفيد ولو شخص واحد بس .. ❤
alhebah.com غير متواجد حالياً   رد مع اقتباس

إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

ترتيب منتديات قبيلة آل حبه عالميا
 

الساعة الآن 06:57 PM


Ads Management Version 3.0.1 by Saeed Al-Atwi
vEhdaa 1.1 by NLP ©2009
الأرشيف
تصميم المنافع لتقنية المعلومات