قصيده الزهد للشاعر مصبح العامري

هذه احدى قصائد مصبح العامري رحمه الله التي ارجوا الله ان تكون في ميزان حسناته ويعلم من هذه القصيده وغيرها توجه الفارس مصبح الى الخير والزهد
واذكر قصه تبين ورعه رحمه الله فقد سجن عرفاء العوامر ومن ضمنهم مصبح في قصه والله اعلم قتل هادي العامري للميموني وكان هناك قينه تبيع قرصان صغيره على المساجين بثمن غالي وكان عريفه ال جبل فارس بن سعد بن علقمه رحمه الله يأخذ زياده عن ما تحدده القينه وله قصيده طريفه في ذلك لا تحضرني الشاهد ان مصبح كان يحلف فارس ان يعلمه وين القرص اللي اشتراه حتى يأكل منه اترككم مع القصيده ونحتاج تحليل للقصيده مثل تحليل الانصب الله يوفقه واذا كان هناك اخطاء في النقل ان تبيين
ألا يـا لله طلبتـك يـا إلـهـي
ويا من لك توجـه كـل جاهـي
لاتكن عنا بساهي ( تم تعديل البيت الى لاتجعل قلبي عنك ساهي والتعديل ممن نقلت عنه القصيده )
وعنـا يـا معيـن الصابريـنـا

ونطلبـك أهدنـا ياخيـر هـادي
نخلـص ماعلينـا مـن مقـادي
وعنـا نجتهـد فيهـا جـهـادي
ويـوم ألقـاك لا واَنـا بريـنـا

ونطلب منـك يـارب العبـادي
تسامحنـا وبلغـنـا الـمـرادي
ويوم الحشر عنـدك والمعـادي
نكـون مـن العبـاد الظافرينـا

وتصلـح ماغبـي وبديـت منـا
نجازي من ظلمنـا العفـو منـا
ترانـا يـوم نـغـدي فاقـدنـا
علـى مـازل وانحـم ماجرينـا

وفي الزلـة تكـون أم سامحنـا
ترى أنحم من شقا الدنيـا محنَـا
نصدقـهـا وهــي ماربحـنـا
وخانت في أهلنا وانحـم درينـا

ونطلبك السعة في كـل حالـي
تراهـا خيـر لاوسعـت بالـي
ترى الشيخ الوسيع من الرجالي
ومكتـوب السـعـة للخيريـنـا

نحسـب كـل يـوم والليـالـي
ولاصدنا مـن الدنيـا النوالـي
تطمَعنا وهـي تبغـى الزوالـي
وفيهـا والعـيـال أم عذريـنـا

وتحيينـا حيـاة أهـل السعـادة
وعناَ نجتهـد لـك فـي العبـاده
وعند المـوت تلهمنـا الشهـادة
وفي زمـرة محمـد حاشرينـا

ونـفـسٍ عذبتـنـا للـرشـاده
تشـق بنـا لعاقبـة الـزهـاده
تريـد لنـا مـع الشيطـان راده
وبعض أشوارهـا منهـا لهينـا

تطمعنـا فـي الدنيـا المنـانـي
وهي دار الفنـا والعمـر فانـي
ومافيهـا بنينـا مــن مبـانـي
ورانـا فانيـة لامــا فنيـنـا

تطالـب فيدهـا يقـرأ القرآنـي
ويقضي الخمس ويكب التوانـي
ويتحفظ عـن أكلـه رمضانـي
ويرمي سبـع رميـات اللعينـا

بدا لي معرفات وحث لي شـأن
ولابي كثر هيضن مثلمـا كـان
غير أنكرت العدواة بين الإخوان
مـن الطالـع بهـم والنادرينـا

وراعي الحق مايقرب له أعوان
ويأخـذ مـال أبـوه إلابديـوان
وناس يخربـون الشـور لازان
يقولون احكمـوا وانحـم لهينـا

ألا ياعاشـق الدنـيـا الدنـيـه
تقـدم لاتحـل بــك المنـيـه
ولو رأيت أن ذا في أيديك شويه
ترى المولى يحـب المحسنينـا

وعد الموت صبحـك والعشيـه
تراهـا مابتفديـك ألـف ديــه
نهار الوعـد وتصيـب الرميـه
. وتنكـر قربتـك والحاضرينـا

يريـد إبليـس للعبـد الغوايـه
ومن يكتب لـه الـرب الهدايـه
يرى ماقـل فـي الدنيـا كفايـه
وبالـرب الإلـهـي يستعيـنـا

َغداً بحكامهـا وأهـل الولايـه
وكم شدوا حرسهـم والحمايـه
وظنـوا حكمهـم مالـه نهايـه
وخلوهـا وراحـوا صاغرينـا

حكـم فيهـا نبـي الله سليمـان
ولم الريح هـي الطيـر لمـان
حكم فيهـا عفاريـت وعربـان
وفـارق حـكـم ذاك الثقليـنـا

وعيسى هو وموسى ولد عمران
وهارون اغرقوا فرعون غرقان
تمنى يحرب الله هـو وهامـان
فراحوا تحـت مـوج غارقينـا

وخلـف بالنبـي سيـد البريـة
محمـد والشيـوخ الهاشمـيـة
ختوم أهـل الصـلاة الشافعيـة
علـى ساقـة محمـد مقتديـنـا

هم أصحاب النبي وأهل الدعيـه
علي في العزم له همـه قويـه
يخلـونـه لـيـوم المكربـيـه
مـن أبطـال عليهـم ناشديـنـا

يقول مصبح درة مني معـارف
معانيهـا تناسـب كـل عـارف
وهيضني لهـا كثـر الـذوارف
من أهـل المحكمـة والمدعينـا

تمنينـا علـى العاقـل نشـارف
وطرفني وأنـا مانـي بطـارف
علينا عجرف أحكامه عجـارف
من أحكامه تشيـب المرضعينـا

ترون الصبر يأهل الصبر قالـه
ترون الصبر من كثر الرجالـه
ويمنعكـم مـن أولاد الفـلالـه
وغير الصبر فأهلـه خاسرينـا

وراعي الجود نفرح بالبقـأ لـه
يحب الضيـف وتحبـه عيالـه
وكل بخيل خاب وخـاب مالـه
ومن راحوا معـه والسارحينـا

يقل مصبح تمـر بنـا الدهـورا
وشبنـا بعـد ماكنـا غـمـورا
وإلى متنـا تشـق لنـا القبـورا
وتنعشنـا رقــاب الناعشيـنـا

سنيـن الدهـر غرتنـا غـرورا
وغرتنـا الليالـي والشـهـورا
وكنـا السـاع ماقبلنـا بـثـورا
. نسينا مامضـى منهـا نسينـا

تقدمنـا وهـي تقعـد ورانــا
وطعناهـا وعـيـن الله تـرانـا
ومن يوم الحساب الحد علينـا .
ومـارب الخلايـق راد فيـنـا

ويلقانـا نكـيـر ومنكـرانـا .
ويوم الحشـر والسايـق ورانـا
يورينـا حسـابٍ فـي حرانـا
وبيـن إيديـك يـا لله واقفيـنـا

وكـل ماخـذٍ بـيـده كتـابـه
وفيهـو رحمتـه وإلا عـذابـه
وعدنـا الله وحـل بنـا حسابـه
يـرد قـومٍ وقـومٍ صادريـنـا

وسيدنا النبـي قبـل الصحابـه
. نهار الوعد يزهى صفنـا بـه
هنـئ أمـة محمـد بالهنـأ بـه
هنـيـن بالهـنـأ للعابـديـنـا

وقـوم خانـوا الله والـرسـولا
فيا ويل لهـم مـن كـل ويـلا
إلى حل بهـم اليـوم الطويـلا
. وسيقوا للحساب أمر سلسبيـلا

دعاهـم للقـضـا ربٍ جلـيـلا
وقـالـوا مالبثـنـا إلا قلـيـلا
وهم صدوا عـن الله والسبيـلا
وظلـوا هـم وشيطانـا لعيـنـا

ألا ياغافـل عـن طـاعـة الله
أنا أدلك تكـن خائـف مـن الله
وكـب الـزود فـإن العـز بالله
ترى أهل الزود خلفـه ناقصينـا

وكـن متجنـبـاً مـاحـرم الله
. ودينك لاتكن فاجـر علـى الله
تـرى قـومٍ تبـرى منـهـم الله
تراهـم لـلـزوال الفاجريـنـا

يهيض خاطري كثـر النواحـي
صبرنا وآخـر الدنيـا البياحـي
وإن أمسينا تميل بنـا الصباحـي
ومشفيـةٍ قلـوب النـاس فينـا

علينا حق مـا فيـه السماحـي
على نفسٍ تهب بهـا الرياحـي
وإلـى ردوا علينـا بالمساحـي
دعوا فينـا نخلـص كـل دينـا

دعونـا للصـراط المستقيـمـا
ومنـه نكتـرب كربـاً عظيمـا
سوى من طاع رحمـان رحيمـا
عيـال الديـن هـم والصايمينـا

تجازوا بالصلاة وأجراً عظيمـا
وفيمـا قدمـوا عصـراً قديمـا
فبشـرهـم بجـنـات النعيـمـا
يقـل فيهـا أخلـدوا ياخالدينـا

وكم من تاعـب يتعـب لغيـره
ولاغاث أهل بيـت لـه بخيـره
خذ الشيطان حزب لـه يشيـره
وقال أربـص مـع المتربصينـا

وكـم مـن تبعـات لـه كثيـره
في الدنيـا ولاحسـب مصيـره
هو المخسور وخذ المال غيـره
وراح مـن العيـال النادميـنـا

يقل مصبح فـي الدنيـا أتفكـر
وكم من عاقـل فيهـا ولاأنكـر
نسينـا يومنـا فيهـا لمحـكـر
نسيـنـاه وعـنـه غافلـيـنـا

نسينا يوم عنـد المـوت نسكـر
ولاعدنا مع أهل الشـور نذكـر
وفارقنـا صغيـر أهـلٍ ولكبـر
وقلـبٍ حبنـا يمسـي حزيـنـا

ولاأحبـابٍ ولاأهـلٍ ينفعونـي
وهم لاوين من سـدي ودونـي
وموتٍ شاخصـه منـه عيونـي
قصينا منـه بيـن أهـلٍ قصينـا

قصينا منـه وأعمتنـي ديونـي
بـه أمـلاك غـلاظ ينشدونـي
وذاك اليـوم ذا فيـه أوعدونـي
بدونـي للديـون أم خلصيـنـا

ومن صدق بذكـر الله وماقـال
تصدق وأحسن النية والاعمـال
ولايعتـز بــأولادٍ ولامــال
فيفني المـال وأهلـه منقضينـا

ومن له ركعـةٍ هبهـا تفضـال
. فهي والحسنات بعشر الأمثـال
تجي من عند معطي العبد لا سال
كريم الوجـه معطـي السايلينـا

هيوضي من بلى عيـا يشـاوي
. وربٍ فوقنـا للنـاس يــاوي
لطيـفٍ معنـا فيـه الرجـاوي
يشافينـا مشافـي المارضيـنـا

ودنيا ماهـي إلا ثـوب عـاره
تعبنـا والتعـب فيهـا خسـاره
وتزهـي تونـاّ ولهـا إنكسـاره
تغـيـر وأهلـهـا متغيريـنـا

غدت بأهل المحاكم وأهل إمـاره
وببراهيـم ذا سـوى العـمـاره
وباسماعيل ذا ارمـا الحجـاره
هـو الرامـي عـدو المسلمينـا

ويوم الوعـد لانـادى المنـادي
نفـارق ذا قريـب والعـبـادي
وضيعن ذكرنـا ذا كـان بـادي
ويبقـى وجـه رب العالميـنـا

ودنيـا مـن سبقنـا زال منهـا
ولكنـا درجنـا فـي ركنـهـا
سـوى يوميـن وإلا دون منهـا
صدرنـا وأقبلوهـا الوارديـنـا

عواقبهـا حليـل النـاس منهـا
تفلكـنـا وكــلٍ لازمـنـهـا
وتحزنـا وشبنـا مـن حزنهـا
. وتضعف راعي الحال السمينا

بنيت مـن المعـارف ماتيسـر
عساني لاغصمت بهـا أتفسـر
ولامنهـا علـى أمـر تعـسـر
وفيـهـا أفـكـار للمتفكريـنـا

تهيأ لـي مثـل النـوى الابكـر
ومنـه عاقـل فيـهـا تفـكـر
ذكرها للعرب فـي كـل مذكـر
ومحلـى ذكـرهـا للذاكريـنـا

بنيت القاف وأنا أشكي المعاضي
وقلبي ضايـقٍ ماهـو براضـي
ويا حلو الطرب لو كنت فاضي
منعتـه مـن هـروج الناقدينـا

ولكنـي بنيـت وقلبـي أعـمـا
من امر حط منـي كـل زعمـا
على رأسي يصب من الوجع ما
وكيف اليا أتهـرج مـا عمينـا

أنا أسمي مصبح العبـد الزهيـد
أسأل مـن الله الـرب المجيـد
أنـا لـي رغبـةٍ فيهـو تزيـد
فـي الغفـران خيـر التايبينـا

وأنـا بختـم بذكـر الله نشيـدي
وبصلاة على المختـار سيـدي
محمد حوضنـا يـوم الوريـدي
إذا شـاء الله عليـه وارديـنـا

القصيده رباعيه

شـكــ وبارك الله فيك ـــرا لك ... لك مني أجمل تحية .

رائعة من روائع الشاعر الحكيم / مصبح رحمه الله
شكرا لك العامري 123
ويعطيك ألف عافيه على ما تقدم
تقبل أجمل التحايا وأعطرها

راااااااااااااااااائع
بارك الله فيك يا العامري
والله لا يحرمنا منك
تسلم يداك ولا عدمناك