يابوي لو تسمع من الحاسد اووه
راع الحسد والحقد دوم يتأوه
آه من الحسرة ..وآه من التوه
وآه من اللي يشتعل فيه جوه
نار تقادح فيه والناس شبوه
وازداد في حقده قليل المروه
ماهو قوي مير الشياطين قووه
وقام يتخيل منطق البغض قوه
ماعاد يقبل من هل النصح مشروه
ولايلتفت للناس حضرة سموه
والله يلو ياتيه شوره من ابوه
عينه عمت ماطاع شور الابوه
ماينتهي لوقلت محرم ومكروه
بالعكس يمكن زاد نصحك عتوه
هذا وبعض الناس له عشرة وجوه
يصعب عليك تميز خيره وسوه
هذاك بالامثال لعاب سموه
مثل الثعل لاجيت تمسكه موه
كلامه يغرك وتحسبه منزوه
برقه يشاف ولا يساقيك نوه
يضحك عليك ومعك وتصير مملوه
ويقول خل هذا وهذاك سوه
واللاش من خاواه اصبح كما اخوه
وماخوته فيها شموخ وفتوه
يندم نديمه دوم ويصير مدلوه
وماتنفعه يابوي ليته ولوه
هذي حقيقة كل حاسد ومعتوه
ومن ضيع بدينه معان الاخوه
حتى غدا بين المخاليق مسفوه
ضايق عليه الكون بأرضه وجوه
والله يلو يصيح ياناس ياهوووه
قفل عليه ابليس وسط العبوه
واليا طرا اسمه بين الاجواد ذموه
وسط المجالس فيه كل تفوه
ومن قدم الحسنى الى الناس حبوه
ويجبر على مثناه حتى عدوه
والعاقل اللي شام عن كل مشبوه
في مجلسه وبروحته وبغدوه
والرزق لو عند المخاليق ما اعطوه
حيث الردي بالطيب ماشب ضوه
عند الكريم اللي عطى يديه ما احصوه
اللي خلق جبريل وادم وحوه
له نلتجي وحده وندعي ونرجوه
رب على العالين يعلى علوه
ويابوي لو تسمع من الحاسد اووه
الطيب مابين الخلايق تشوه .