وقوف الجار

بسم الله الرحمن الرحيم
صلوا على رسول الله جميعا
موضوعي هاليوم موضوع لوسيع الصدر يمكن مايلتفت فيه أو يمرره مرور الكرام،،، ولكن في اعتقادي إن كثير من الناس ينزعج منه وقد يخاصم وقد يضارب
وقد تصل للشرط والمحاكم ألا وهو موضوع :

((وقوف جارك بسيارته أمام بابك على طول رغم كلامك له مرات ومرات وتجاهله))

ارجو من الجميع الشعللة في الحوار ولايبقى أحد إلا وهو يحاور ويناقش ويدلي برايه ،، حتى لايشره علينا عود الأراك

أبيها شعلله ........... تفضلوا..

الاشقر
يعطيك الف عافيه
ويسرني ان ارد على اول موضوع لك
بالقسم هذا
والله يالحبيب آخذه بالتي هي احسن واقوله يابن الحلال
ترى الي قاعد تسويه غلط يا انك رجال تخش معي المجلس حياك
او روح تربع داخل بيتكم وفكنا من الشرهه
واتركه اذا سمع الكلام خير وبركه وكفاني شره
أما اذا كان غير ذالك وركز معي بأما
ارجع اترفص ببطنه وصدقني يالحبيب يا بعدها انه يتوب
يالاشقر احصل عندك مفتاح عجل
يوه يوه ما عليش تقبل مروري وتعليقي

أولاً ... بارك الله فيك يالأشقر

خجلتني من كثر ما عطيتني من المديح ... والله العالم إني مستاهل كل ذالكيل

لكن طيبتك تخلي الناس طيبة بنظرك

أعذرني ماني حق قصايد أكون رديت لك شي من منايحك يا بعد حيي

لو أدور مالقيت غير قصايد لعنتر كلها حروب وسكاكين ما تنفع بريالين

إنما ... جزاك الله كل خير وأصلح سريرتك وعلانيتك

وجعلك خير وبركة وين ما رحت




أما .. بخصوص موضوعنا والتلبيق قدام الباب


فالله يرزقنا وأياكم بيت بالدنيا وبيوت بالجنة

نصفط الناقة على جنب ونعرّض الددسن بطولها في حلالنا

لا أجار ولا شارع تجاري أو حكومة تمنيك بيت العمر اللي كهلنا قبل ما نبصر الميدة حقته



أما التلبيق قدام الباب فأكيد إنه مظهر غير حضاري ومخالف لأداب الجوار


لكن دامنا من شاكلة المستأجرين ونسبة 70 % من الشعب الغير متملك
فمن المؤكد يسري علينا نظام الإشتراكية (الكل للفرد والمكان للجميع )

وفوقها تذكر إننا صرنا مثل خرشة وأولادها اللي كل يوم لها جهة ومكان جديد ( فليش البهذلة .. ما معك غير تصبر عليه )

أذكر مرة إني كنت أزوي نفسي بارض فاضية مهجورة ألبق فيها الماي باخ حقتي .. لكن ليتهم خلوني أنا وسكنتي لحالنا

الإ .. لقيهم يقلطون مكاني ... وكأنهم يحملوني جميلة على فعايلهم

هيا تكفى قلي وين ألبق بعدها ؟؟

أبنشر كفر سيارتي مثلاً .. أو أطعن بنقالي حتى يرتاحون




لكن صبراً يا صاحب السمو وأزم أعصابك تراه أحسن

لا ينفقع لك عرق أو يجيك شد عضلي في ذالبرد

" مجرد رأي "




.

يا اشقر اللون قلي وش جرح قلبك
ذا جرح جارك ولا واحدٍ عضك
( الجار قبل الدار)
بعض الجيران يراك عود في عينه ليه لانك من الجهة الفلاني ( جاهلي) من بعيد يقفي .
وهذه ابرك الحزات لانك ترفع نفسك بالتواضع .
والبعض انت يروح يجي سيم سيم .
والبعض غرور مع جهل ( فقير ومتكبر) موذي في البر في البحر في الجو والله يعين صاحب السمو
لاصلاح ذات البين كل يوم وهو في بيت عشاء وغداء ومن شرطة الى شرطة (الاولاد متضاربين ، اخذ جزء من ارضك ، سد الشارع،
شب نار واذاك بالدخان ، وقف في بابك وسيارتك بالداخل ، كسر سيارتك ، فحط عليك .....الخ) .
الحليم من صبر واحتسب ولنا في رسول الله اسوة حسنه .
الصبر مفتاح الفرج ولعله يموت او يسافر او ينقل او يجعل له جار اشد منه بأس ولعلا الله يتوب عليه ويحسن لجاره ويندم على افعاله.
المزراتي 2011 تغير لونها وانكسر زجاجها وانسرق كفرها وعلى بعد 500 متر من البيت والسبب الجار قبل الدار.

ماقصرتم ياهل العقل والحكمة
منكم نستفيد علوم وتجارب

مير في ناس(ن) مامعهم الفكة
ودنا بحضورهم والتقارب

سطر حروفك وجنب السكتة
مانريد التصفح والتهارب

شعلللللللللللللللللللللللة