الله يلعن ابليس ~

خالد : فهوووود هلا والله يالقاطع وينك الله يلعن ابليس ماتنشاف !

فهد : هههههههههههههههه هلا بك أبو وليد أبد والله في هالدنيا والجامعه

خالد : لاتكشخ علينا كلنا في الجامعه ولا غبنا هالغيبه ( ويضحك )

فهد : ياشيخ قسم بالله إن حالي من ألعن لألعن خلها على ربك بس

خالد : الدكاترهـ شكلهم جايبين فيك العيد

فهد : ايه الله يلعن الشيطان واللي جابوهم


انتهى الحوار


سارهـ ( وهي تبكي ) : مها شفتي الشيطانة الملعونه كيف تطالعني !

مها : ايه الله ياخذها خليها أنا أوريك فيها

سارهـ : لا تكفين مها ، فكينا من شرها

مها : لالا أنا اللي بخليها تلعن الساعه اللي عرفتنا فيها


انتهى الحوار




السلام عليكم ورحمة الله وبركاته



لا ترتاعون من عنوان الموضوع تراني أمزح ~



حوارين بسيطين ، تقريبا يدورون بشكل يومي بيننا في مجتمعنا ، حولنا وحوالينا

بس ماتلاحظون ان الحوار شوي مؤذي !

الموضوع ومافيه إن اللعن منتشر بيننا بشكل خيالي ،

مثل ماتنتشر النار في الهشيم ، والكل ياخذهـ ببساطه

مثل خالد و فهد يقول له الله يلعنك يا ابليس والثاني يضحك ، مستوعب أنت وش قال لك خويك !!!

ماراح أتكلم عن معنى اللعن ولا حكمه لأننا من الابتدائي نعرف هذا الشي

لكن بتكلم عن الشي الملعون وش يصير !!!




قصه من عهد النبي صلى الله عليه وسلم عندما كان في أحد أسفارهـ

وامرأة من الأنصار على ناقة فضجرت الناقه ، فلعنتها المرأهـ

سمعها رسول الله صلى الله عليه وسلم فقال : " خذوا ما عليها أو دعوها فإنها ملعونة "


لاحظوا إنهم في سفر ومنقطعين والناقة هي الراحلة الوحيدهـ لهم واللي كان عليها امرأهـ يعني مالها شدة مشي مثل الرجال

ومع كذا أمرهم أمر مايسمح بالتراجع إنهم يتركونها ، ليه طيب !!!!

لأنها ملعونه ، وصلت لكم فكرة قد ايش الكلمه كبيرهـ !!!!



طيب حديث ثاني ،

قال رسول الله صلى الله عليه وسلم :" إن العبد إذا لعن شيئا صعدت اللعنه إلى السماء

فتغلق أبواب السماء دونها ، ثم تهبط إلى الأرض فتغلق أبوابها دونها

ثم تأخذ يمينا وشمالا ، فإذا لم تجد مساغا رجعت إلى الذي لُعن

فان كان لذلك أهلا والا رجعت إلى قائلها "



فهمتوا !


انت وانتي لما تلعنون شخص أو أي شي ، اللعنه تروح كل مكان لحد ماتوصل للملعون

إذا كان يستاهلها خلاص ، لكن اذا مايستاهلها ترجع لك


وغالبا وخلوني أقول 90 بالميه من اللعن اللي يطلع مننا يطلع على أشياء ماتستاهل اللعنه

يعني 90 بالميه من اللعن يرجع لنا ،

بالله عليك ممكن يجي يوم وتلعن نفسك !!!


أجل أبشرك تراك تلعن نفسك دايما في كل مرهـ تلعن شخص أو شي مايستاهل


يالغالين الموضوع كبير والكلمه كبيرهـ ، أتمنى انكم استوعبتوا هالشي

وإني قدرت أوصل اللي أبيه يوصل وتستفيدون منه ..




أخيرا ، ماكان من صواب فمن الله وما كان من خطأ فمني والشيطان


تقبلوا كلماتي ، وأعتذر منكم على القصور ..
</B></I>

جزاك الله خير الجزاء على هذا التذكير صدقتي أوخيتي فيما تطرقتي اليه اللهم أبعدنا عن اللعن وعن سوء الاخلاق سلمت يداك مون لايت مشاركه قيمه تقبلي أطيب وأعذب الأمنيات

صحيح أن العنوان استفزازي لكن الموضوع جدا مهم و هو من علامات آخر الزمان و الله المستعان. لا ينبغي أن نتساهل مع الاطفال عندما نسمعهم يلعنون لأن من يريد التغيير يبدأ منهم

أسأل الله أن يتوب على الجميع آميـــــــــــــــــــــــــــــــــــــــــــــــ ـــــــــــــــــن

مون لايت
شكراً لك ولـ طرحك المميز
فقد أستفدت منه كثيراً
وأنا ايضاً انصح الأخوة الكرام بأن يجتنبوا اللعن
وخاصة في ساعة الغضب
لانه من كبائر الذنوب
اسأل الله العلي العظيم أن يتجاوز عنا وأن يغفرلنا خطايانا ...

أحسنتي أخيتي...
بارك الله فيك .......
مع ودي