يا صـرم قلبـي . !

قال الذي وضـعه على كف عفريت = وطـول انـتظاره زلزل القلب زلزال
كبده عليله و اخـتلـط مـاه بالزيـت = ومـمّا لجابه هـامل الدمـع هـطــّال
يـشكي زمانن فـتَّت الكـبد تفـتيت = ولا احدن يعدِّل ميلة الوقت لا مال
مـن جور صـفعات الليـالي تربِّـيت = وقـتٍ غثاه امشيِّبٍ روس الاطفـال
مصايـبه تـترى على غـير توقـيت = منها رزين الـعقـل بالوضع يهتال
ما فـي قِـدره لـو صِبرت و تـلزّيـت = ولاعاد بي طوقه علىالحِمل واشتال
ومن كثر ماجرَّبت واردَفت واوحيت = وقـاسـية بالدنـيا هموم وغـثـا بـال
قِـدرت احَكِّم وجهتي دون تشتيت = واسوق رجلي بين ممشى و زرفـال
وان ضاق صدري من غثا الوقت سَجّيت = و اخذت لي من مَارَد الشِعرْ مِنهال
بنـات فكرن من ضـميري تـنـقّـيت = نـبدع صيـاغة قـافيتها و الامـثال
مِن عِـقبها زال الـكدر و اسفهلّيت = قِـيفـانها تشرح ظروفي و الاحـوال
يا ما عـلى روس المراقـيب عدّيت = ودِفـَعة زفـرات الألـم عقب ولـوال
وكم ليلةٍ فـي نومها ما اسـتلذّيت = جداي اهوجس و ارسل الفكر يجتال
هاض الضمير وهاض فكري ولا اغفيت = عن الكرى عيني بها ذِعر واجفال
لين اذّن المذّن و اقـامـوا و صـلّـيت = ممّـا لجا بي كـن بالـقلب سـلاّل
بحرن من الهاجوس وسطه تواريت = دونه زمت جِرد الجراهيد واجبال
باسباب من عسكر على الكبد حلتيت = ما عاد خلاّ بي من الصبر مـثقال
بالحب عن غيره من البيض خصّيت = لجله نبيع الروح في سوق الآجال
عـزّ الله إني فـي غـرامـه تـمـاديت = ولا الله قسم لي في ذرى فيّه اظلال
حاولت أغيّر رغـبتي فـيه و ازريت = و تعبت اناقش مار الإشكال ما زال
احترت بالحـيلة وبالوضع قـرّيـت = ما دام مالي حيلةٍ كيف ابا احتال
يا صرم قلبي صرم نبت السواريت = صرم العسيب اللي من الفرع ميّال
على الذي فـي وصلهم مـا تـهنّيت = بيني و بينه منقطع بث الارسـال
كتمت حِـبّه بالـضـماير و كـنّيت = مـن خوف يفضح سِـرّنا كل خـتّال
وان مـارحمني داعـج العـين ولّيت = غديت مثل اللي على جِرف و انهال
يا بو سعد من عقـبكم ما استقرّيت = يا عزّ من حدِّه زمـانه على الجال
مـن طيب سـيرتكم عليك استدلّيت = و عـليك علّقـنا الأمـاني و الآمـال
لا تحسب إنِّي عن عهودي تخلّيت = أو خِنت مـيثاق المحبّة و الاجلال
حـاشا و كـلاّ غـيركُم مـا تمنّيت = مير انت تعرف ضيق وقتي والاشغال
لا شك من كـثر الـتردّد تعـنّيت = و اتعب فؤادي كِثر الإقفى والاقبال
باب الرجا من دون صاحبك صكّيت = وفـتحت للهجران سـتين مِدخال
قصدك تبا تـنفع رفـيقـك و ضرّيت = اتـلفت كبده و الهوى سِـم قتـَّال
خـلّـيتـني مـضـحـاكـةٍ للـشماميت = وفـرّحة فـيني كل حاسد و عـذّال
أودعتـني مالي جِدى كود يا لـيت = و علّقـتم الموضوع من شهرْ شوال
متى فؤادي ينتعش عقب ما اذويت = واروي مداليج الحشا عقب الامحال
من طول صبري يا بن الاجواد ملّيت = كنّ الحشا عقب البِِِِطا يشعِل اشعال
يا مـا على شانك من الهم قاسيت = أنطر مراسيلك و اقـول العنـا طـال
صبرت فـي رجوى الجواب وتحرّيت = لاخذت لي موعد ولا ارسلت مِرسال
ولولاي شاري قربكم كان ما جيت = فـيكُم رغِبت و كلمة الحق تـنقال
وإن مـا قـضيتُم مطلبي عنكم اقفيت = و اعتظت غيرك عن جنابك بالابدال
كـانك عـلى هـالإتّـجـاه اسـتمرّيت = ما عاد لي فـي مـقطن الذّل مِنزال
و الـمعذرة و ان كان بالهرج زلّيت = وصـارت سـوالفنا سـواليف جِهّـال
شيٍّ ذكرته مـن كثيرنٍ له اخفيت = و لا كل ما يطري على البال ينقال
قددّر ظـروفـي يـوم للخـط دزّّيت = تـراي جـالس وانـتظر مـنك جوّال
حيثك عريب الجد فـيك استعزّيت = وحطّيت لك في ربـعة القلب و مدهال
أنت الذي في ماقف الطِيب حاميت = هذي مـواريـثك من الجـد و الخال
قرمن على روس الـشواهق تـساويت = سِـقم المعـادي ريف من حدّه اللال
بالخير والمـعروف مـا قِـد تـوانـيت = وكسبت حبّ الناس من طيب الافعال
مـا يوم عن درب المنـاعير هـسّيت = شيّدت لك ذكرٍ على روس الاقـذال
حرٍّ عـديمن ماكرك بـالـنواحيت = صلـيب راس و للصّعيبات حَــلاّل
وجهِك بشِر يضوي كما يضوي اللّيت = يا ما لـبستـم للشرف كل سـربال
مـثل الـقمر فوق الـكواكب تـعلّيت = مثلك بـعد مـوته يـطرّز بـتـمثـال
ولولاك غالي كان ما فـيك غاليت = الله يـجيرك من زمانك و الانـذال
نحرص على الطيّب ولا نمدح الهيت = يا مكرم العاني و يا ضـد من عـال
عـلى الـشكاله والرجولـة تضرّيت = ضرّاك عـودٍ دونه الرمل قـد حـال
جعل السحاب اللي مزونه مفاخيت = يسقي ثرى قـبره مـن الودق هـمّال
راع الفـعول الطـيّبـة ذايـع الصيت = زبن الضعيف اللي تردّى به الحال
مـن نـسل قومن بـالمـلاقا طـواغيت = نسل الحواما امـطـوّعـة كل عـيّال
روس الرجـال النـّادريـن الزناتـيت = رجّـالهم يـسوى ثـلاثـيـن رجّـال
نارن على العـدوان مثل الديناميت = فيما مضى عاداتهُم كسب الانـفـال
لا جـا نهارن فـيه كثر الـتـصاويت = فـيـه الـمنـايا بـين شـاري و دلاّل
والبـيض لجّن و ازعجن بالزغاريت = والجيش زرفـل بـين راجل و خيّال
ما خـيّـبوا ظـنـّك اليـا من تعزويت = بـمـصـقـّلاتٍ تـودع الـدّم شـلاّل
انحر بـهم راس الـعـدا ما تـتـقّيت = خوض المعارك عندهم شرب فنجال
هذا الصواب ولاحدن قايل اخطيت = قـلته و انـا ماني بكاذب و دجّـال
عندي عليه امـن الدلايل تـثـابيت = ما تـنحجب شمس الحقيقـة بـغربال
تـمّ الجواب اللي بالاوراق خطّيت = من شاعرن فـي غيهب الشوق رحّال
وصـلاة ربّي عـدّ مـن طاف بالـبيت = عـلى النبيّ المصطفى طـيّب الفـال

دائماً لأطروحاتك فلك خاص
يضم المبدعين بين جنباته
ويضم السحر بين اكفه
فهنا اجتمع فن الانتقاء وفن روعة العقليه
سلمت يمينك
ولك احترامي وتقديري

كتمت حِـبّه بالـضـماير و كـنّيت = مـن خوف يفضح سِـرّنا كل خـتّال
وان مـارحمني داعـج العـين ولّيت = غديت مثل اللي على جِرف و انهال


مبدعه دائما يابنت الاجواد
قلبتى علينا المواجع
قصيده ذو شجون وفيها كم هائل
من المشاعر والاحساس التى تهيض
كل قلب
اجمل التحايا واعطرها

لكل شيء جلاء، وإن جلاء القلوب ذكر الله عز وجل

بنـات فكرن من ضـميري تـنـقّـيت = نـبدع صيـاغة قـافيتها و الامـثال
مِن عِـقبها زال الـكدر و اسفهلّيت = قِـيفـانها تشرح ظروفي و الاحـوال
يا ما عـلى روس المراقـيب عدّيت = ودِفـَعة زفـرات الألـم عقب ولـوال
وكم ليلةٍ فـي نومها ما اسـتلذّيت = جداي اهوجس و ارسل الفكر يجتال
هاض الضمير وهاض فكري ولا اغفيت = عن الكرى عيني بها ذِعر واجفا

اختيار موفق وقصيدة رائعة

لك مني كل اجمل تحية

لا عدمناااااااااااااك