أخطاء علمية تعودنا نشوفها بالأفلام

أخطاء علمية تعودنا نشوفها بالأفلام






1- كاتم الصوت والمسدسات

الصوت الخفيف اللي نسمعه والمجرم حاط الكاتم (مثل صوت حبل ينسحب من تحت الفراش بسرعة ) كلَك بكلَك. الكاتم يخفف الصوت بس مو وايد راح يظل صوت الطلقة قوي، وقوي كفاية انه الفريج الجيران يقومون منه بعد. علمياً قوة صوت الطلقة من غير الكاتم توصل 150 ديسيبل، ومع الكاتم يصير 120، الفرق مو وايد.





2- شاحنات نقل البنزين والأكشن

ياخذ له رشاش ويخلصه عالشاحنة بعدين ينفجر الخزان وتطلع ألعاب نارية وإذا كنت محظوظ راح تشوف اسم الفيلم ينكتب بالنار عالأرض، وتلقى البطل عافس ويهه ومعطي الخزان ظهره وماشي يعني مو هامّه وحد الكوول

طلقات المسدس أو الرشاش شبه مستحيل تخترق الخزان بالأساس؛ وحتى لو قلنا يالللللههههههه هالطلقة قوية حيل ومصنوعة مخصوص حق اختراق الخزانات، كل اللي يصير الخزان يسرّب بنزين شوي لا أكثر ولا أقل.






3- كل شي في الفضاء بطيء



مقاطع الفضاء بالأفلام أو حتى الثقافية منها لشركة ناسا واللي نشوفها بالأنترنت دايما نشوفهم يتحركون بطيييييييييءءءء حيييييلللل مثل مقطع مصورينه عالبطيء. اللي يشوفهم يقول حركتهم ثقيلة كلش. حتى واحنا صغار نبي نلعب يعني رواد فضاء نسوي روحنا نطير عالبطيء

الانطباع هذا مو حقيقي، رواد الفضاء يتحركون بطيء عمداً. يعني يقدرون يتحركون بسرعة بس ما يبون. ليش؟ المساحة داخل المركبة الفضائية حيل صغيرة واحتمال كبير يكسرون أجهزة او يطيحون أغراض أو يتعورون إذا تحركوا بسرعة من غير حساب.

فكر فيها، الحركة في الفضاء أسرع بسبب انعدام الجاذبية، إذا ماكو شي يشدك لجهة معينة أكيد بتصير أسرع.





4- المكالمة الهاتفية للمعتقل

كلمن دش السجن له حق بمكالمة هاتفية غصباً على أكبر راس بالمخفر. تلقى المجرم أو البطل يحن على راسهم “أبي مكالمتي” و “أبي أدق تلفون” “عطوني التلفون لا أشتكي”.

لا يبه كلام فاضي، بعض السجون يخلونك إي وبعضهم لأ، ماكو قانون يلزمهم بهالمكالمة اللي تخليك تدق على واسطتك وربعك. مادري على شنو هابّين بهالحركة بالأفلام.






5- المجرم يدّعي انه مختل عقلياً في المحكمة

أغلب قضايا المحاكم بالأفلام نلقى المجرم يدّعي انه مختل عقلياً عشان يطلع براءة أو يخففون من الحكم عليه، و 90% من الحالات تنتهي لصالح المجرم.

بالصج المحاكم نااااادراً حيييييييل يستخدمون هالادعاء لتعقيده وضعف فرصته في المحكمة. يقولون بأمريكا بس واحد بالمائة من القضايا يستخدمون فيها هالعذر، ورُبعهم بس اللي يربحون القضية! وتقريباً كلهم يكونون مستخدمينه فقط كعامل، يعني ما يكون الاعتماد كلي على ادعاء انه مختل عقلياً.






6- كفخة ورا الراس تمسح ذاكرتك



يراوونك واحد من الربع على قشمرة كفخ صماخ رفيجه من ورا والأخ فقد الوعي بعدين قام مو ذاكر شي ولا حتى اسمه. بعدين ينكفخ مرة ثانية بالصدفة وكل شي يرد طبيعي.

بالصج حالات فقدان الذاكرة فوق انها نادرة حيل تلقى من النادر أكثر انها تصير من ضربة على الراس.

بس ودي أعرف من صج في أحد مر عليه شخص فقد الذاكرة طبعاً ما أقصد ألزهايمر في فرق بين الاثنين.








7- السمك الصغير المتوحش اللي ياكل لحوم البشر



نشوف واحد يطيح ببحيرة أو نهر بمنطقة استوائية ومرة وحده يصرخ من قُمة راسه وسطح الماي يتحرك بسرعة يعني أسماك صغيرة مفترسة قاعدة تنهش في الريّال فقير.

الأسماك هذي حقيقية ما عليها كلام، وفعلاً عندها أسنان حادة (شوفوا الصورة) وتاكل لحم إي محد يختلف. بس بالصج ياكلون الأسماك الأخرى بشكل رئيسي مو بشر. ما ياكلون بشر إلا إذا ذبحهم الجوع وكانوا مجموعة كبيرة بحوض صغير يخليهم يتنرفزون، إذا صار وواحد طاح بالحوض هالحزة بس تلقى يعضون ويقرمون منه بس، مو ياكلونه أكل عالآخر ويخلونه عظم نفس ما نشوف بالأفلام والكارتونات.






8- الحرب في الفضاء




الفضاء ما فيه هوا أو أي مادة تنقل الصوت، إذا في شي ينفجر ما راح يطلع صوت قوي يبط اذنك والسفن الفضائية تسمعه. حتى يوم يحفرون أو يستخدمون أجهزة أو يمشون بسيارة على سطح أي كوكب أو قمر فضائي ما راح يطلع صوت مزعج من عملية الحفر أو ماكينة السيارة وتوايرها أو صوت أجهزة.







9- واحد يطيح وبنص الطيحة يمسكونه عشان لا يوصل الأرض ويموت



بالأفلام الخارقة تشوف وحده تطيح من فوق عمارة عالية والرجل العنكبوت أو باتمان أو سوبرمان أو أي خبل من هالطقة يطيرون من الجنب ويمسكونها بنص الطيحة وينقذونها، والكل يستانس ومحد تعوّر. بالصج هالكلام ما يصير.

لما يطيح واحد من ارتفاع عالي وبنص الهوا مسكه شخص مرة وحده اثنينهم راح يروحون فيها، يعني ما يفرق إذا مسكه شخص بإيده أو طاح عالأرض لأنه السرعة عالية وراح تعوره بالحالتين. والطايح راح يتعور أكيد، مو يعني إذا طاح بإيد بطل أو واحد قوي خلاص سلامات ما صار شي.

إلا اللهم إذا الواحد صار بنفس سرعة سقوط الشخص وبعدين مسكه وبعدين قلل السرعة تدريجياً وطار،،، إنطرني .






10- تحديد مكان المكالمة يبيله حوالي الدقيقة

لازم المجرم يظل يتكلم بالتلفون مع المحقق حوالي 45 ثانية أو دقيقة أو أكثر علما يصيدون مصدر المكالمة ويروحون له. لا يبه هالأيام بس يرن التلفون خلاص عرفوا من وين متصل ووين قاعد بالضبط.







11- نط من الدريشة عادي الزجاج ما يجرح



الزجاج اللي يستخدمونه بالأفلام هذا من نوع خاص بس حق المشاهد وينكسر بسرعة يصير مثل تراب ما يعوّر الممثلين. بالصج الزجاج نادراً ينكسر إذا ركضت ونطيت عالدريشة أو الباب الزجاج أو واجهة المحل.

يمكن إذا شفتوا نشرات الأخبار بالصج حق أحداث الشغب راح تلاحظون الناس اللي تحذف كراسي عالمحلات زجاجهم ما ينكسر بسرعة نفس الأفلام، هذا الصج عاد كيفكم.






12- السجاير المولعة تشب البنزين

يصبون خط من البنزين على مسافة معينة لي سيارة أو طيارة وبعدين واحد يقط سجارته المولعة والنار تشب بالخط ليما توصل للسيارة أو الطيارة وكاااابووووووووم انفجار والعاب نارية.

في واحد خبير بالأدلة الجنائية اسمه ريتشارد تونتارسكي سوا تجربة سنة 2007م كان يولّع سيجارة ويقطها بصينية أو صحن بنزين. عاد التجربة 2000 مرة، ولا مرة من هالألفين ولّع البنزين من السيجارة!






13- السيارة إذا كانت حد الدوسه تقدر تعبر الحفر الكبيرة



عشان تطوف السيارة حفرة كبيرة بين جسرين أو طرفين بناية ما راح يفرق إذا كانت دايسه أو لأ، بالحالتين راح تطيح السيارة. فيزيائياً لازم يكون في شي يخلي السيارة تصعد بزاوية مرتفعة عشان توصل للجهة الثانية وبسرعة معينة.









14- الطلقات تطلّع شرار

يفرغون مسدسات ورشاشات على البطل اللي يناقز ومحد يحوشه وحوالينه نشوف شرار يطير يعني الطلقات مبوشه الهدف. طلقات المسدس مصنوعة من الرصاص وما يصدر منها شرار سواءاً حاشت الكاشي أو معدن أو خشب أو خشم ديناصور.






15- السيارات المحترقه تنفجر





من الحالات النادرة انفجار السيارة بسبب الاحتراق، أنا شخصياً شفت سيارة تحترق جدامي وقعدت نص ساعة تقريباً أشوفها تحترق علما وصلوا المطافي والحمد لله ما انفجرت.

نفس الشي إذا طاحت سيارة من مرتفع عالي أو رشوها بمسدس أوتوماتيكي أو طلقات وايد، المفروض ما تنفجر.





16- واحد يطير لي ورا من طلقة حاشته

يعني لازم مسدسات الأبطال شي ما صار ولا استوى، هوليوود يحبون يشوفون البطل يطق بمسدسه العجيب وهو مكيّف أو حتى منسدح مرتاح وتلقى الأشرار يتطشّرون أمتار لي ورا من الطلقات.

ما يصير يبه والله ما يصير ، يعني وين قاعدين يا عالم يا بشر حرام عليكم ، في شي اسمه فيزيا، في واحد شق راسه واهو يفكر وطلع بنظريات اسمه نيوتن وقانونه الثالث يقول “لكل فعل رد فعل، مساو له في المقدار ومعاكس في الاتجاه. بشرط ان لايتأثر من تلقى الفعل بشكل سلبي يؤثر على رد فعله.” إذا واحد طق مسدس طلقته قوية لازم اهو يطير لي ورا أو تنكسر ايده عشان المجرم يطير لي ورا.

…..

مشكووووووووووووور

والله يعطيك ألف عافية

شكــــــــــــــرا لك

موضوع رائع ومميز

الله يعطيك العافية

تقبل أجمل تحية

شكرا جزيلا بارك الله فيك موضوع مميز

شكــــــــــــــرا لك


موضوع رائع ومميز


الله يعطيك العافية