خلوني ابعد على باقي حياتي واعيش
ماعاد للعمر كثر اللي مضى له معاش
ياكثر مااشيل في صدر ٍ يغيض ويطيش
لو جيت ابا اقول مايكفيه قول ونقاش
ماشالته في الشتاء والصيف رحلة قريش
يضيم فـِجّ النحور مع الجـِمَد والهشاش
ليش الخطا يازمان ٍ ضقت بالنفس ليش؟
تدحم بجنب ٍ كما جمر الغضا مايناش
اتعبت معك الركاب بكل درب ٍ وحيش
ياما سريت الدروب مع العتم والغباش
اصبر وحملك كبر ذهلان لو كان ريش
وانته تجمّع ضعون الهمّ لو هي طشاش
واليوم ماعاد لي ياناس معكم مَعِيش
ماعاد خلا ّ زماني في حياتي عِراش
خلوني ابعد عن اللمه وهرج الهتيش
اللي بنت بالهروج صروح والفعل ماش
دايم بسيرة رجال الطيب تنهش نهيش
ولاعذرب اهل الوفا والطيب غير الخداش
انا لياضاقت الحيلات مانيب تِيش
النية اصفا من الهداج والقلب شاش
مانيب خبل ٍ على اللي عند غيره يشيش
شوفي على كل عالي مانزلت الهقاش
مايدفن الجوع في بطنه بلحم الوليش
ياكود لاش ٍ على ماقيل من صلب لاش
لاضاق وقتي وجاء لـ جْنوب وقتي وشيش
وربع الرخاء يوم قل الزاد جاهم رعاش
ياوسع بيدا ً فرشها الله لخلقه فريش
ذب الدروب الوساع ولاتهاب الخشاش
رزقي على من نصر جنده على كل طيْش
وبأمره نزل يوم نشـّا المزن صاف الرشاش