ومدري والله ليه سمي كذا وليه نسب للاشوريين لكن نقدر نسميه مندي سريع او مندي على الطاير
لانه لايحتاج تحفير وبرميل وحوسه
المقادير /
دجاج او لحم حسب الاشخاص
بصل وطماط
بهارات وتوابل (كركم + كمون + ماجي .. الخ ) + ملح + ماء
زيت + رز حسب الاشخاص
الطريقة /
كل شخص له طريقته في تزبيط دجاج او لحم المندي فيعضهم ما يحط فيها الا الملح وبعضهم يسوي له تتبيله وانا منهم
فسويت التتبيله بالبيت وطريقتها احط لي قدر واصب فيه الزيت
ثم احمس البصل لين يبدا يتحمر
بعد كذا احط الطماط والصلصة والبهارات والملح و اللي تبي من المنكهات وان بغيت فلفل حط ( الصرار )
واخليهم على النار لين تصير التتبيله سميكة شوي والبهار تفوح ريحته
بعد كذا جبت الدجاج وحطيته في الحافظة حتى اصب عليه الخلطه وانا حطيته بحافظه عشاني بطلع فيه الاستراحه ولا تقدر تحط الدجاج في قدر او صينيه وتبهره
وهذي صورة الدجاج بعد التتبيل
بعدها طلعت الاستراحه حتى اكمل الجزء الثاني من الطبخ
وفيه متطلبات لازم تكون موجوده وهي قدر للرز وقدر كبير حق ذبيحه او اصغر شوي
وفحم و مركابه للقدر واهم شي صحن معدن ويكون مخرق وان كان فيه شبك حديد على قد القدر يمشي الحال وهذي صوره المطلوبات
بعد كذا نشب الفحم
ثم نبدا مشوار الهف على الجمر لين يشعلل ويصير مثل كذا
بعدها نجيب القدر الصغير ونحطه فوق المركابه على النار ونحط البصل وحبات من الثوم حسب الرغبه ونبدا نحمس حتى يتحمر البصل
بعدها نحط الطماط ونزبط الامور
بعدها نزيد الكشنه مويه ونحط اللومي والبهار والملح ثم نضيف الرز بعد ما نغسله وتكون المويه اعلى من الرز بشوي بحيث ان الملعق لو تحط بالطول ما تطيح وان بغيت عاد يكون الرز ممرس شوي زد المويه مثل الصورة
بعد كذا نجيب الصحن المعدن اللي مخرقه وبوسطه الدجاج ونحطه فوق القدر اللي فيه الرز على طول مثل هالصورة
ثم بعد كذا نجيب القدر الكبير ونحطه فوق الدجاج وقدر الرز بحيث يكتمه ويصير زي البرميل حق المندي بس بالعكس زي كذا
طبعا نحط على الجوانب تراب وانتوا بكرامه حتى ما يكون فيه تسرب للحرارة وننتظر تقريبا ساعة الا ربع الى ساعه واللحم ينتظر له ساعه ونص الى ساعتين حسب النار وقوتها الله يحرم هالوجيه عنهاا
بعد ذلك نشيل القدر الكبير وننتبه للتراب وانتوا بكرامه بحيث يتم التنظيف جيدا منه قبل رفع القدر حتى ما تخرب الدعوه وبيكون شكل الدجاج كذا
واما الرز بيكون كذا
وهذي صورة الطبخة قبل الهجوم
وبالهناء والعافية
__________________
اللهم انصر اخواني في سوريا الحبيبه وثبت أقدامهم وسدد رميهم
اللهم وفقني لما تحب وترضى
[gdwl]اللهم أرحم عمي وأغفر له وجميع أموات المسلمين[/gdwl]